1 vnumber="1"> נחמו נחמו עמי--יאמר אלהיכם
2 vnumber="2"> דברו על לב ירושלם וקראו אליה--כי מלאה צבאה כי נרצה עונה כי לקחה מיד יהוה כפלים בכל חטאתיה {ס}
art="x-p"/>
3 vnumber="3"> קול קורא--במדבר פנו דרך יהוה ישרו בערבה מסלה לאלהינו
4 vnumber="4"> כל גיא ינשא וכל הר וגבעה ישפלו והיה העקב למישור והרכסים לבקעה
5 vnumber="5"> ונגלה כבוד יהוה וראו כל בשר יחדו כי פי יהוה דבר {פ}
art="x-p"/>
6 vnumber="6"> קול אמר קרא ואמר מה אקרא כל הבשר חציר וכל חסדו כציץ השדה
7 vnumber="7"> יבש חציר נבל ציץ כי רוח יהוה נשבה בו אכן חציר העם
8 vnumber="8"> יבש חציר נבל ציץ ודבר אלהינו יקום לעולם {ס}
art="x-p"/>
9 vnumber="9"> על הר גבה עלי לך מבשרת ציון הרימי בכח קולך מבשרת ירושלם הרימי אל תיראי אמרי לערי יהודה הנה אלהיכם
10 vnumber="10"> הנה אדני יהוה בחזק יבוא וזרעו משלה לו הנה שכרו אתו ופעלתו לפניו
11 vnumber="11"> כרעה עדרו ירעה בזרעו יקבץ טלאים ובחיקו ישא עלות ינהל {ס}
art="x-p"/>
12 vnumber="12"> מי מדד בשעלו מים ושמים בזרת תכן וכל בשלש עפר הארץ ושקל בפלס הרים וגבעות במאזנים
13 vnumber="13"> מי תכן את רוח יהוה ואיש עצתו יודיענו
14 vnumber="14"> את מי נועץ ויבינהו וילמדהו בארח משפט וילמדהו דעת ודרך תבונות יודיענו
15 vnumber="15"> הן גוים כמר מדלי וכשחק מאזנים נחשבו הן איים כדק יטול
16 vnumber="16"> ולבנון אין די בער וחיתו--אין די עולה {פ}
art="x-p"/>
17 vnumber="17"> כל הגוים כאין נגדו מאפס ותהו נחשבו לו
18 vnumber="18"> ואל מי תדמיון אל ומה דמות תערכו לו
19 vnumber="19"> הפסל נסך חרש וצרף בזהב ירקענו ורתקות כסף צורף
20 vnumber="20"> המסכן תרומה עץ לא ירקב יבחר חרש חכם יבקש לו להכין פסל לא ימוט {ס}
art="x-p"/>
21 vnumber="21"> הלוא תדעו הלוא תשמעו הלוא הגד מראש לכם הלוא הבינותם מוסדות הארץ
22 vnumber="22"> הישב על חוג הארץ וישביה כחגבים הנוטה כדק שמים וימתחם כאהל לשבת
23 vnumber="23"> הנותן רוזנים לאין שפטי ארץ כתהו עשה
24 vnumber="24"> אף בל נטעו אף בל זרעו--אף בל שרש בארץ גזעם וגם נשף בהם ויבשו וסערה כקש תשאם {ס}
art="x-p"/>
25 vnumber="25"> ואל מי תדמיוני ואשוה--יאמר קדוש
26 vnumber="26"> שאו מרום עיניכם וראו מי ברא אלה המוציא במספר צבאם לכלם בשם יקרא מרב אונים ואמיץ כח איש לא נעדר {ס}
art="x-p"/>
27 vnumber="27"> למה תאמר יעקב ותדבר ישראל נסתרה דרכי מיהוה ומאלהי משפטי יעבור
28 vnumber="28"> הלוא ידעת אם לא שמעת אלהי עולם יהוה בורא קצות הארץ--לא ייעף ולא ייגע אין חקר לתבונתו
29 vnumber="29"> נתן ליעף כח ולאין אונים עצמה ירבה
30 vnumber="30"> ויעפו נערים ויגעו ובחורים כשול יכשלו
31 vnumber="31"> וקוי יהוה יחליפו כח יעלו אבר כנשרים ירוצו ולא ייגעו ילכו ולא ייעפו {ס}
art="x-p"/>